Kamola yo'lda

@kamola_yolda

Bir paytlar bu yerda hozirgidek katta ko'l bo'lmagan! 😮 Hozir esa cho'l bag'rida ufqqacha cho'zilgan suv yastanib yotibdi. Gap Navoiy viloyatining Nurota tumani yaqinidagi Aydarko'l haqida ketyapti. Qiziq, cho'l o'rtasida shuncha suv qayerdan paydo bo'lgan? Hammasi 1969-yilda boshlangan. O'sha yili Sirdaryoda kuchli toshqin bo'lib, Chordara suv omboridagi ortiqcha suv Arnasoy pasttekisligiga yo'naltirilgan. Suv tabiiy botiqliklarda to'planib, Aydar-Arnasoy ko'llar tizimi shakllana boshlagan. Keyingi yillarda ham bu yerga suv kelib turgan. Shu tariqa inson faoliyati va hududning tabiiy tuzilishi ta'sirida katta ko'l paydo bo'lgan. 🌿 Nega aynan bahorda borish yaxshi? Mart oxiri, aprel va may oylarida cho'lning ayrim joylari yam-yashil tusga kiradi. Havo ham yozdagidek issiq bo'lmaydi. Qushlarni kuzatish, ko'l bo'yida sayr qilish va chiroyli suratlar olish uchun ayni muddao. Ayniqsa, tongda va quyosh botayotgan paytda ko'l manzarasi juda chiroyli bo'ladi. Nurota tomondan bormoqchi bo'lsangiz, transportni oldindan kelishib oling. O'zingiz bilan ichimlik suvi, bosh kiyim, quyoshdan himoya vositasi va shamoldan saqlaydigan ustki kiyim oling. Do'stlar bilan birga borsangiz, yo'l xarajatlari ham arzonroq tushishi mumkin. Aydarko'l faqat dam olish uchun emas, tabiat manzarasi qisqa vaqt ichida qanchalik o'zgarishi mumkinligini o'z ko'zingiz bilan ko'rish uchun ham borishga arziydigan joy.

09.11.2026

Uzbekhub'da davom eting

Suhbatlar, guruhlar, stories va reels - hammasi bitta joyda.

Ro'yxatdan o'tish

App Store Google Play